Швейцарияда мамыражай өмір сүріп жатқан экс-шенеунікке халықаралық іздеу жарияланды

Мұхтар Әблязовтің туған құдасы, экс-төтенше жағдайлар министрі Храпуновтың басына да қара бұлт үйрілді. Швейцарияда мамыражай өмір сүріп жатқан бұрынғы қазақ шенеунігіне халықаралық іздеу жарияланып, бұл мәлімет Интерполдың ғаламтордағы сайтына жарияланды.

Бұрын Қазақстанда бірқатар лауазымды қызметтерді атқарған Виктор Храпуновқа қатысты қылмыстық іс ол елден кетіп қалған соң, былтыр күзде ғана қозғалған еді. Алматыда әкім болып тұрған кезінде жер телімдерін заңсыз үлестіргені үшін ол 2007 жылы қызметінен қуылған-ды. Көп ұзамай Храпунов емін-еркін Швейцарияға тайып тұрды. Ал еліміздің құқық қорғау органдары араға біраз жыл салып барып оған қатысты қылмыстық іс қозғады. Виктор Храпунов болса, осы күні Швейцариядағы ең бай адамдардың тізіміне ілігіп, ұлы дәулетін мақтана хабарлап жүрді. Ашықтан-ашық. Ол тұрып жатқан жерін де жасырған емес. Енді еліміздің құзырлы органдары оған жақында ғана халықаралық іздеу жариялап, Интерполдан көмек сұрапты. Тіпті, бүгін Алматы қалалық қаржы полициясындағылар еліміздің тұрғындарынан Виктор Храпуновқа қатысты ақпараттармен бөлісуді сұрап, мәлімдеме жасаған. Шетелде тайраңдап жүрген экс-шенеунікке қатысты ел тұрғындарынан көмек сұрайтындай, еліміздің құқық қорғау қызметкерлерінің не дәрменсіз күй кешіп отырғаны әзірге белгісіз.