Жаңалықтар

Ерланби Дәулетияр - жүргізуші
Алматы облысында дүниеге келген. Мамандығы экономист болғанымен, өнер мен шығармашылыққа жақын ол телевизия саласындағы қызмет жолын 2000 жылы Петропавл қаласындағы облыстық телеарнада ойын-сауықтық бағдарламасының жүргізушісі болып бастаған. 2006-2007 жылдары Алматыдағы продюсерлік орталықтардың бірінде арт-директор болды. КТК телеарнасында 2007 жылдан бері. «Жаңалықтар» ақпараттық бағдарламасын 2008 жылдың қазан айынан бастап жүргізіп келеді.
Бойдақ, жұлдызнамасы - сарышаян, ермегі - бильярд.

Мәдина Балғабаева - жүргізуші
Алматы қаласында туып өскен. Мамандығы - драматург. Қазақ ұлттық өнер академиясын тәмамдаған. Көрермендерге телеарна жаңалықтарының жүргізушісі ретінде таныс. «Серпер» мемлекеттік жастар сыйлығының иегері. 2007 жылы Мәскеуде өткен ТМД журналистері жобаларының байқауында «100 народов Казахстана» авторлық жобасы үшін «Бриллиант содружества» жүлдесін ұтып алды. 2009 жылдың наурыз айынан бері КТК жаңалықтарын жүргізіп келеді. Он жастағы Ілияс есімді ұлы бар. Бос уақытында мұз айдынында мәнерлеп сырғанауды ұнатады.

Жанат Бакыт - жүргізуші
2006 жылы әл-Фараби атындағы Қазақ ұлттық университетін қызыл дипломмен тәмәмдаған. 2004 жылы «Хабар» телеарнасындағы «Алтыбақан» бағдарламасын жүргізді. 2005-жылы НТК телеарнасындағы «Соңғы ақпараттар» бағдарламасын жүргізді. 2006 жылдан бері КТК телеарнасындағы «Жаңалықтар» ақпараттық бағдарламасының жүргізушісі. «Ана тілі аруы», «Қыз сыны» байқауларының жүлдегері. Бос уақытында өлең, новелла жазғанды ұнатады, ал хоббиі – көлік жүргізу. Отбасылық жағдайы - Алла қосқан жолдасының адал жары, бір ұлдың анасы.

Дастан Шымырбай – жүргізуші, тілші
1985 жылы дүниеге келген. 2006 жылы Қазақ ұлттық университетінің журналистика факультетін бітірді. Төрт жыл бойы оқыған мамандықты тастап кетуге қимай, телевизия саласына келді. Дегенмен қазіргі жұмысын жанындай жақсы көріп істейді. Ұстанымы: “Артық айтып ат шығарғанша, ақылға салып аз сөйлеген жақсы”. Қымыз бен ет болмаса, өмірден дәм кетеді деп есептейді. Алматы облысындағы Жылысай ауылында өскен ол бүгінде ата сусынды Алматыда да іздеп жүріп ішеді.

Зәуре Тұрсынбекқызы – спорт жаңалықтарының жүргізушісі

   "Дакар " раллиге қатысып, Рональдиньомен кездесуді армандайды. Әлемде өтіп жатқан барлық спорт оқиғаларынан хабардар. Жүгіру мен секіруден алдына жан салмайтын бойжеткеннің көңіл күйі әрқашан көтеріңкі. әл-Фараби атындағы Қазақ ұлттық университеті журналистика факультетінің түлегі. Мақсаты - спорт саласында үлкен жетістіктерге жету.

Ольга Спирина – спорт жаңалықтарының жүргізушісі

  Ольга Спирина 1991 жылы Алматы қаласында дүниеге келген.Қазақ    тілін бала кезінен үйреніп жүр. Мектеп қабырғасында оқып жүріп  республикалық «Ұлан» газетінің жас тілшісі де болған. Халықаралық бизнес университетінің  студенті. Экономика саласы бойынша білімін ұштап жүрген Ольга өзінің болашағын телевизиямен байланыстырады. КТК арнасының спорт редакциясында 2011 жылдың наурыз айынан бастап жұмыс істейді. Спорт әлеміндегі жаңалықтардан шет қалмауға тырысады. Аты аңызға айналған Мұхаммед  Әлиді әлемдегі заманымыздың ең үздік боксшысы деп санайды. Жұлдызнамасы – таразы. Бос уақытында қазақ тіліндегі  көркем шығармаларды оқуды ұнатады. 

Артур Ізбасов – шығарушы редактор
Ақтөбе облысы Ойыл ауданында дүниеге келген. Абай атындағы Қазақ ұлттық педагогикалық университетінің түлегі. Мамандығы – тарих пәнінің мұғалімі. Журналист болам деп ешқашан армандаған емес. КТК арнасында 2005 жылдан бері қызмет етеді. Бос уақытында кітап оқып, көңілінің қошы келіп жатса тамақ пісіргенді ұнатады. Үйленген, бір ұлы бар. Жұлдызнамасы - Тауешкі, бірақ, өзі оған ешқашан сенген емес. Ұлтжанды, коммунистер десе төбе шашы тік тұрады.

Ғабит Ұзақбай – тілші
Қызылорда облысының түлегі. 2000-2005 жж Астана қаласындағы Еуразия ұлттық университетінің филология факультетін тәмамдады. Телевизия саласында жұмыс істеуді 2004 жылдан бастады. Сол жылы «Астана» телеарнасының “Оқиға ізімен” криминалдық тақырыптағы бағдарламаны жүргізді. Одан кейін “Эра” телеарнасының жаңалықтар қызметінде екі жылдай еңбек етті. 2007 жылдың қазан айынан бастап КТК телеарнасында. Тарихи шығармаларды оқығанды және осы жанрдағы киноларды жақсы көреді. География ғылымы да қызықтырады. Арманы – португал теңізшісі Фернанд Магеллан жүріп өткен жолмен дүниежүзін айналып шығу. Отбасылы, ару қыздың әкесі. Жылы -Тышқан, жұлдызы - Тауешкі. Ұнататын ойындары - шахмат пен бильярд.

Ербол Сейілхан – тілші
Ақтөбе облысы, Шалқар қаласында дүниеге келген. Шалқар - солтүстігінде Мұғалжар тауы сілемдерімен шектесетін, оңтүстігін Ұлы Борсық, Кіші Борсық құмдары алып жатқан аудан. «Бойымда  жылт еткен жақсылық болса, ол үшін туған топырағыма қарызбын. Ал азды-кемді  білместігім  - жастығымның, албырттығымның «арқасы».
Ақтөбе университетінің журналистика бөлімінде  оқи жүріп, жергілікті  БАҚ  бірқатарында  еңбектеніп, тәжірибие жинады. Ақтөбеде алты  жылдай тілшілік пен  тележүргізушілікті қатар алып жүрген ол: «Үйренгенімнен үйренерім көп» - дейді.
2010 жылы  Оралдағы  «ТДК-42» телеарнасының  Астанадағы меншікті тілшісі, «7-Арнаның» Қарағанды облысындағы меншікті  тілшісі  болып жұмыс істеген.   
«Жерұйық іздеп жүрмін»; мамандығымен мақтанатын  Ерболдың   жар таңдауда да «жаңылыспасам» деген арманы бар. Ән салуға, поэзияға,  жалпы,  әдемілік  атаулының бәріне  құштар. 

Әйгерім Асқарқызы – тілшілер қосынының редакторы
«Бақ қайда барасың? Береке бірлігі бар жерге барамын» Осы нақыл сөз ұжымдық жұмысты талап ететін телевизияға арнап айтылған деп есептейді. Алматы қаласында туып өскен. әл-Фараби атындағы Қазақ ұлттық университетінің журналистика факультетін қызыл дипломмен тәмамдады. КТК арнасында I курстан бастап жұмыс істеп келеді. Әлемдік классикалық әдебиетті сүйіп оқиды. Алыс сапарға шыққанды ұнатады. Үлкен тенниспен шұғылданады. Жұлдызнамасы – Бикеш.

Бекзат Жүсіп – тілші
1989 жылы 6 ақпанда Маңғыстау облысындағы Ұштаған ауылында дүниеге келді. Туған жеріндегі ең мықты саналатын саланы таңдап, алғашында мұнайшы болуды армандаған 16 жасар жас жігіт тосыннан Ақтаудағы “West” радиоcына келіп, журналистика оның ой-қиялын баурап әкетті. 2008 жылы Бекзат әл-Фараби атындағы Қазақ ұлттық университетінің журналистика факультетіне түсті. «Әріптес достарым мұнайды тастап, журналистикаға келген сені ғана білеміз деп қалжыңдайды»,-дейді оқу мен жұмысты қатар алып жүрген жас жігіт.

Нартай Аралбайұлы - тілші
Батыс Қазақстан облысы, Бөкей Ордасындағы Нарынның бұйрат-бұйрат құмдарында дүниеге келді. Отбасында жалғыз перзент болғандықтан еркелеп, қиғылық салатын сәттер аз болды. Аудандық газетке мақала жазам деп жүріп, әл-Фараби атындағы Қазақ ұлттық университетінің журналистика факультетіне түсті. Еңбек жолын қалалық Алматы телеарнасында бастады. “Сабаққа бармайтыным болмаса, жақсы студентпін, Бойдақтығыма қамыт салынбады демесеңіз төрт құбылам тең» - дейді. Қадыр Мырза-Әлінің “қардай ақ бол, суық болма, судай мөлдір бол, сұйық болма, тастай берік бол, қатты болма” дегені өмірлік ұстанымы.

Құралай Пионер – тілші
Алматы іргесіндегі Талғар кентінде туған.  2007 жылы әл-Фараби атындағы Қазақ ұлттық университетінің филология бөлімін екі жылғы магистратурасымен қоса үздік тәмамдаған. Еңбек жолын 2005 жылы “Ана тілі” баспасында редактор-дизайнер қызметінен бастап, телеарналардың бірінде балаларға арналған бағдарлама әзірлеумен жалғастырды. Одан кейін үш жылда  ақпараттар қызметінде аймақтық жаңалықтар бөліміне жетекшілік етіп келді. Ал 2011 жылдың маусым айынан бері “КТК” телеарнасының “Жаңалықтар” бөлімінде тілші болып істеп келеді. Әзірген отбасын құрмаған, ата-анасы ерте дүниеден озғандықтан артындағы үш бауырына қарайлап келеді. Жұлдызнамасы – Тауешкі. 

Төлеген Жұмабек – спорт комментаторы
Оңтүстік Қазақстан облысы, Қазығұрт ауданы, Қосағаш елдімекенінде туып өскен. 1984 жылы Алматы энергетикалық иститутын бітіріп, 1986- 1988 жылдары Алматыдағы троллейбус паркінде қызмет істеді. Медиа әлеміндегі қадамын 1987-1989 жылдары “Қазақтелефильм” студиясынан бастаған. 1989-1991 жылдары мемлекеттік телерадио қызметкерлерінің Бүкілодақтық білім арттыру институтын тәмамдады. 2001 жылдан бері КТК телеарнасында. Әзілдеп сөйлегенге құмар. Ермегі – спорт. Үйленген, екі ұлдың әкесі.

Елдос Қамбалиев – спорт редакциясының тілшісі

  Шығыс Қазақстан облысында дүниеге келген. Қазақ ұлттық университетінің түлегі. Бала кезінен теледидардан әлемдік спорт додалардың бірін жібермей тамашалайтын. Спорт журналистикасын  жоғары қояды. Англияның “Ливерпуль” клубының жанкүйері. Болашақта  аталмыш  клубтың белді ойыншысы Стивен Джерардпен сұхбат алу ойында бар. Бос уақытында достарымен доп тепкенді ұнатады. Футболдан БАҚ арасындағы жарыста соққан жалғыз добын әлі күнге дейін жыр қылып айтып жүреді. Сондай-ақ үстел теннисін де шебер ойнайды. Жұлдызнамасы - Торпақ. 

Аймақтық тілшілер:

Бекжігіт Мәуленов – Оңтүстік Қазақстан облысындағы тілші
М.Әуезов атындағы Оңтүстік Қазақстан мемлекеттік университетін қызыл дипломмен тәмамдаған. Негізгі мамандығы – мәдени іс-шараларды ұйымдастырушы режиссер. Телевизиядағы алғашқы қадамын диктор болып бастаған. КТК арнасына келгелі шымкенттік шенеуніктердің №1 қасына айналды. Журналистикадағы негізгі ұстанымы: «Мәселе – Сізде емес, Сіздің кателігіңізде!». Үйленген, екі баланың әкесі.
Жұмыс телефоны- 8 (7252) 41 02 53, эл.поштасы - Bekzhigit_m@mail.ru

Эльмира Ахметова – Шығыс Қазақстан облысындағы тілші
Негізгі мамандығы мұғалім болса да басына бала оқыту жазбапты. Алғаш рет телеарна есігін Семейде осыдан 7 жыл бұрын ашқан. Содан бері журналистикадан қол үзбей келеді. Жергілікті телеарнада ойын-сауықтық, танымдық, ақпараттық бағдарламаларды да жүргізіп көрді. 2007 жылдан бері КТК телеарнасында. Ұнататыны - әсем әуенді беріле тыңдау. Эстетика оның басты назарында, тіпті жаны құштар. Ас-үй шаруасын енді-енді ғана игеріп жүрген жайы бар.
Жұмыс телефоны- 8 (7232) 26-19-18, эл.поштасы- emma_6@mail.ru

Гүлмира Тасболатқызы – Солтүстік Қазақстан облысындағы тілші
Алматыда туып, Қызылордада өсті. Көпбалалы отбасынан шыққан. 1993 жылы Қазақ қыздар педагогикалық институтын, 2003 жылы М. Қозыбаев атындағы СҚМУ заң факультетін бітірді. Тұрмыста, екі қыздың анасы. Арманы – әлемді аралап шығу. Әдебиетті, поэзияны жақсы көреді. Фитнеспен, шығыс биімен айналысады. Көлік жүргізгенді ұнатады. «Машинамның ішіндегі саймандардың әрқайсысы қандай қызмет атқаратындығын білгім кеп тұрады. Көлігім сынып, СТО-ға бара қалсам, көлік жөндейтіндердің миын ашытып, ананы-мынаны сұрап, тыныштық бермеймін», -дейді.
Жұмыс телефоны- 8 (7152) 36 09 45; 36 55 79; эл.поштасы - saulebekova@mail.ru

Айзат Тұрғынбекқызы – Ақмола облысындағы тілші
Солтүстік Қазақстан облысы, Айыртау ауданындағы Құмтөккен ауылында 1967 жылы дүниеге келген. Көпбалалы отбасынан шыққан. Негізгі мамандығы – мұғалім. Дегенмен журналист болуды армандап, институтты бітіре салысымен облыстық газетке тілішілік қызметке орналасты. Кейін жергілікті телеарнаға ауысып, тележурналист мамандығын игерді. Қарапайым халықтың мұң-мұқтажын ойлап, әділдік іздеу жолында аянбай еңбек етуде. Адамның бойындағы адамгершілік, адалдық қасиеттерді пір тұтады. Жағымпаз, "ләппәй құлдық" деп тұратындарды жақтырмайды. 2007 жылдан бері КТК телеарнасында. Тұрмыста, екі баланың анасы.
Жұмыс телефоны- 8(7162) 25 44 87, эл.поштасы- aisatktktv@mail.ru

Жаңалық Ахаш – Ақтөбе облысындағы тілші
Адам есіміне оның тағдыры жасырылған. Жаңалықтың «Жаңалықтарда» жұмыс істеуі о-бастан белгілі болғандай. Ақтөбе облысы Шалқар ауданының түлегі ақпарат әлеміне кішкентайынан әуес болды. 11 сыныпта оқып жүріп еңбек жолын облыстық радионың ақпарат бөлімінде тілшіліктен бастады. Бірер жылдан соң телевизия саласына бет бұрды. Журналистиканың қыр-сырын меңгерсем деген ниетпен баспасөзде де қызмет атқарды. Үйленген, ұл мен қыздың әкесі. Достарымен бірге демалыс сайын пейнтбол ойнап, табиғат аясында демалғанды ұнатады. «Егер журналистикаға келмегенде, аспаз болар едім» - дейді.
Жұмыс телефоны – 8 (7132) 55-40-11, эл.поштасы - zhanalik_ahash@mail.ru

Айжан Әлібек – Павлодар облысындағы тілші
Шығыс Қазақстан облысында дүниеге келген Айжан кішкентайынан журналист болуды армандады. Бірден сыни, өткір тақырыптарда репортаждар жазудан тайынбаған жас тілші облыстық газетте жарық көрген материалы үшін тіпті мектеп директорынан сөгіс алған. Дегенмен алған бетінен қайтпаған Айжан, Сұлтанмахмұт Торайғыров атындағы Павлодар мемлекеттік университетінің журналистика факультетіне түсіп, үздік бітірді.
Бос уақытында қиялын қағазға түсіріп сурет салуды, іс тігуді ермек қылады. “Әйел адам бесаспап болуы тиіс” деген қағиданы ұстанатын ол дәмді тағам әзірлеудің шебері. Оның француз кондитерінен арнайы сабақ алғаны да бар. Қазір араб, ағылшын тілдерін меңгеріп жүр. Отбасында жан жарымен бірге Хасан есімді ұлын тәрбиелеп отыр.
 Жұмыс телефоны – 8 (7182) 55-45-66, aizhantakenova@rambler.ru

 Саят Сабдалы – Қарағанды облысындағы тілші

Алматы облысы, Енбекшіқазақ ауданында дүниеге келдім. Жер жаннаты - Жетісуды студенттік жылдары Арқа төсіне айырбастап, Қарағандыда тұрақтап қалдым. Мамандығым - алғашқы әскери дайындық пәні мұғалімі. Бірақ мамандық бойынша жұмыс істеген жоқпын.  Үйленгенмін, қыз бен ұлдың әкесімін. Журналист болам деп үш ұйықтасам түсіме кірмеген. Алғашында жергілікті арнада жұмыс істейтін бір қызға ғашық болып, соған жақын болу үшін редактордың  «спорт тақырыбында жаза аласың ба?»  дегеніне құлдық деп,  аяқ астынан тілшілік қызметке кірісіп кеттім. Содан кейін жергілікті арнаның бас редакторы қызметіне дейін жұмыс атқардым. «Азаттық»  радиосында, одан кейін «Стан тв» интернет бейнепорталдарының Қарағанды облысы бойынша меншікті тілшісі болдым. 2011 жылдың қараша айынан бастап КТК телеарнасындамын. Қолым қалт еткенде кітап оқығанды ұнатамын. 

Олжас Сайлаубекұлы – Семей қаласындағы тілші

«Өзіңе сен, өзіңді алып шығар, еңбегің мен ақылың екі жақтап» деген ұлы Абайдың сөзі – өмірлік ұстанымым. Небір ғұламалар дүниеге келген киелі  Шығыс Қазақстан облысында тудым. Көкпекті ауылында, қарапайым отбасында өсіп өндім. Үш баланың ішіндегі ерке кенжесімін. Шәкәрім атындағы Семей мемлекеттік университетін «Журналистика» мамандығы бойынша тәмамдадым. Студенттік шақтан бастап жергілікті «Қазақстан-Семей» арнасында Жаңалықтар қызметінің тілшісі мен жүргізушісі қызметін атқардым. 2011 жылдың қараша айынан бастап “КТК” телеарнасының Семей қаласындағы меншікті тілшісімін. Бос уақытта мистика, триллер жанрындағы кино көруді қатты ұнатамын. Футбол, воллейбол, шахмат, әсіресе, бильярд ойнауды жақсы көремін. Жұлдызнамам –сарышаян. 

Байланыс телефондары: 8 (7222) 52 40 62; 8 705 500 58 43;

Электронды пошта:  olzhas_ns@mail.ru